आता असं करू या

आता असं करू या
अनोळखी होऊ या पुन्हा
अन बघू या , घडतोय का
पुन्हा तोच गुन्हा

वाटेल का तुला तेच
नव्याने माझ्याबध्दल ?
की आता नक्की झाला आहे
तुझ्यामध्ये बदल ?

खरंच का आवडणार नाही
माझं तुझ्यामागे लागणं?
खरंच तू म्हणणार नाहीस
"ईश्श्य ! काय रे तुझं वागणं !"

काय हरकत आहे ,
दोन चार पावसाळे मागे जायला?
अन पुन्हा एकदा तसंच
मनसोक्त भिजायला?

हे मिळमिळीत जगणं...
करूया का चटकदार?
चल होऊन जाऊ पुन्हा
एकाच गुन्ह्याचे भागीदार !